ललितपुर, १० बैशाख २०८३ः
ए. बि. पेलेट फिड प्रा. लि. को सहकार्यमा देवीचौर बहुउद्देश्यीय दुग्ध उत्पादक सहकारी संस्था लि. तथा सचेतक दुग्ध उत्पादक सहकारी संस्था लि. द्वारा आयोजित पशुपालन व्यवसाय तथा आहारसम्बन्धी एक दिने तालिम कार्यक्रम सफलतापूर्वक सम्पन्न भएको छ।
किसानहरूको ज्ञान, सीप र उत्पादन क्षमता अभिवृद्धि गर्ने उद्देश्यले आयोजना गरिएको उक्त कार्यक्रममा स्थानीय किसानहरूको उल्लेखनीय सहभागिता रहेको थियो। कार्यक्रममा देवीचौर बहुउद्देश्यीय दुग्ध उत्पादक सहकारी संस्था लि. का अध्यक्ष बिष्णुमणि तिमल्सिना तथा सचेतक दुग्ध उत्पादक सहकारी संस्था लि. का अध्यक्ष सोमनाथ तिमल्सिनाको विशेष उपस्थिति रहेको थियो।
त्यसैगरी, ए. बि. पेलेट फिड प्रा. लि. का म्यानेजिङ डाइरेक्टर पिताम्बर सञ्जेल तथा कार्यक्रम संयोजक दिपेश लामिछानेको सक्रिय सहभागिता रहेको थियो। कम्पनीका प्रतिनिधिहरू बुद्धिमान कार्की, भुवन खुलाल, कर्ण बहादुर राई र श्रेया थापाको सहभागिताले कार्यक्रमलाई थप प्रभावकारी बनाएको थियो।
कार्यक्रममा बोल्दै अध्यक्ष बिष्णुमणि तिमल्सिनाले यस्ता तालिमहरूले किसानहरूलाई गाईभैंसी पालन, रोग नियन्त्रण तथा फार्म व्यवस्थापनमा महत्वपूर्ण ज्ञान प्रदान गर्ने बताउनुभयो। उहाँले यस्ता कार्यक्रमहरूले उत्पादन वृद्धि, लागत व्यवस्थापन तथा व्यवसायिकरणमा टेवा पुग्ने उल्लेख गर्नुभयो।
ए. बि. पेलेट फिड प्रा. लि. का म्यानेजिङ डाइरेक्टर पिताम्बर सञ्जेलले पशु आहारको महत्वबारे प्रकाश पार्दै सन्तुलित र गुणस्तरीय दाना प्रयोग गर्नु पशुपालन व्यवसायको आधारभूत आवश्यकता भएको बताउनुभयो। उहाँले वैज्ञानिक रूपमा तयार गरिएको दाना प्रयोग गर्दा पशुको स्वास्थ्य सुधार हुनुका साथै दूध उत्पादनमा वृद्धि हुने जानकारी दिनुभयो।
प्रमुख प्रशिक्षक डा. उमेश मण्डलले पशु प्रजनन समस्या (Infertility), सन्तुलित आहार तथा पोषण व्यवस्थापन, फार्म स्थान छनोट, गाई–भैंसीका जात तथा विशेषताहरू, दाना व्यवस्थापन, पोषक तत्त्व, सामान्य रोगहरूको पहिचान तथा नियन्त्रण, बायोसेक्युरिटी, आन्तरिक तथा बाह्य परजीवी तथा Mastitis जस्ता विषयहरूमा विस्तृत प्रशिक्षण दिनुभएको थियो।
यसै क्रममा ए. बि. पेलेट फिड प्रा. लि. का पशु प्राविधिक बुद्धिमान कार्कीले गाई–भैंसीलाई आवश्यक पोषक तत्त्व, दानाको मात्रा तथा खुवाउने समय सम्बन्धी व्यवहारिक जानकारी प्रस्तुत गर्नुभएको थियो।
उक्त तालिममा करिब ४५ जना किसानहरूको सक्रिय सहभागिता रहेको थियो। सहभागीहरूले तालिम अत्यन्त उपयोगी रहेको प्रतिक्रिया दिएका छन्। साथै, भविष्यमा यस्ता कार्यक्रमहरू नियमित रूपमा सञ्चालन गर्नुपर्ने आवश्यकता पनि व्यक्त गरिएको छ।