नेपालगन्ज, मङ्सिर १०, २०८०ः
नेपालगन्ज उपमहानगरपालिका १८ स्थित बस्तीबाट जङ्गली जनावर जरायोलाई शनिबार दिउँसो नियन्त्रणमा लिइएको नेपालगन्ज सब डिभिजन वन कार्यालय राँझाका सहायक डिभिजन वन अधिकृत नारायण पार्धेले जानकारी दिनुभयो । शनिबार बिहान कुकुरले लखेट्दै ल्याएर खेतको खाडलमा खसेर अड्किएको अवस्थामा जरायो पाइएको उहाले बताउनुभयो ।
बर्दिया राष्ट्रिय निकुञ्जको डार्टिङ टोलीको सहयोगमा खाडलमै रहेको अवस्थामा ‘डार्ट’ प्रयोग गरेको र ‘डार्ट’ गरिसकेपछि जरायोले अग्लो बनाएर छेकेको जालसमेत उफ्रेर नाघेर सडकतिर भागेको उहाँले बताउनुभयो । पार्धेका अनुसार भागेको जरायोलाई लखेट्दै जाँदा अत्तालिएर एक स्थानीयको घरको कोलियाभित्र पसेपछि त्यहाँबाट नियन्त्रणमा लिइएको हो । ‘डार्ट’ प्रयोग गरेको करिब दुई घण्टापछि मात्र नियन्त्रणमा लिन सकिएको उहाँले बताउनुभयो । करिब १५० किलोको भाले जरायो कसैले घरमा पालेको हुनसक्ने पार्धेको अनुमान छ । ‘डार्ट’ प्रयोग गरी नियन्त्रणमा लिइएको उक्त जरायोलाई शनिबार नै बाँके राष्ट्रिय निकुञ्जमा बुझाइएको पार्धेले जानकारी दिनुभयो ।