भक्तपुर।
पुस्तक तथा पठन संस्कृतिको प्रवर्द्धन गर्ने उद्देश्यले भक्तपुरमा ‘रोटरी पुस्तक प्रदर्शनी २०८३’ आयोजना हुने भएको छ। रोटरी क्लब अफ भक्तपुरको आयोजनामा आगामी कार्तिक १२, १३ र १४ गते तीन दिनसम्म सञ्चालन हुने प्रदर्शनी भक्तपुर दरबार स्क्वायरस्थित विद्यार्थी निकेतन विद्यालयमा आयोजना गरिनेछ।
रफत सञ्चार क्लबमा आयोजित पत्रकार सम्मेलनमार्फत आयोजकले प्रदर्शनीबारे जानकारी दिएको हो। आयोजकका अनुसार प्रदर्शनीको उद्घाटन नेपाल मजदुर किसान पार्टीका अध्यक्ष नारायणमान बिजुक्छेंले गर्ने कार्यक्रम छ।
प्रदर्शनीमा पुस्तक, साहित्य, कला, संस्कृति र बौद्धिक विमर्शसँग सम्बन्धित विभिन्न गतिविधि सञ्चालन गरिनेछ। कार्यक्रमअन्तर्गत पुस्तक विमोचन तथा लेखक भेटघाट, जिल्लाव्यापी अन्तरविद्यालय चित्रकला प्रतियोगिता, ‘ख्वप गजल’ कार्यक्रम तथा ‘भक्तपुर हिजो, आज र भोलि’ विषयक प्यानल छलफल आयोजना गरिने आयोजकले जनाएको छ।
रोटरी क्लब अफ भक्तपुरका अध्यक्ष दशरथ प्रजापति र कार्यक्रम संयोजक प्रभात राईले पत्रकार सम्मेलनमा प्रदर्शनीका कार्यक्रम तथा उद्देश्यबारे जानकारी दिएका थिए। प्रदर्शनीलाई पुस्तकप्रेमी, विद्यार्थी, लेखक, साहित्यकार तथा सिर्जनात्मक क्षेत्रमा रुचि राख्ने व्यक्तिहरूका लागि साझा मञ्चका रूपमा विकास गर्ने लक्ष्य राखिएको छ।
प्रदर्शनीको आकर्षणका रूपमा जिल्लाव्यापी अन्तरविद्यालय चित्रकला प्रतियोगिता पनि रहनेछ। प्रतियोगिताले विद्यार्थीमा रहेको कलात्मक प्रतिभा उजागर गर्नुका साथै उनीहरूलाई सिर्जनात्मक गतिविधिमा सहभागी हुन प्रोत्साहित गर्ने अपेक्षा गरिएको छ। त्यस्तै, ‘ख्वप गजल’ कार्यक्रममार्फत गजल तथा साहित्यमा रुचि राख्नेहरूलाई आफ्ना सिर्जना प्रस्तुत गर्ने अवसर मिल्नेछ।
‘भक्तपुर हिजो, आज र भोलि’ शीर्षकको प्यानल छलफलमा भक्तपुरको ऐतिहासिक पहिचान, वर्तमान अवस्था र भावी सम्भावनाबारे विचार–विमर्श गरिनेछ। यसले भक्तपुरको मौलिकता, सम्पदा, संस्कृति र विकासका सवालमा छलफल गर्ने अवसर प्रदान गर्ने आयोजकको अपेक्षा छ।
पुस्तक विमोचन तथा लेखक भेटघाट कार्यक्रमले पाठक र सर्जकबीच प्रत्यक्ष संवादको अवसर सिर्जना गर्नेछ। यसबाट पाठकले लेखकका विचार, सिर्जना र लेखन यात्राबारे जानकारी लिन सक्नेछन् भने साहित्यिक गतिविधिमा समेत सहभागिता बढ्ने विश्वास गरिएको छ।
तीन दिनसम्म सञ्चालन हुने प्रदर्शनीमा पुस्तक तथा पठन संस्कृतिको विकाससँगै कला, साहित्य र सिर्जनात्मक गतिविधिलाई प्रोत्साहन गर्ने विभिन्न कार्यक्रम समेटिएका छन्। पुस्तक, साहित्य, कला र विचारलाई एउटै मञ्चमा जोड्ने उद्देश्यसहित आयोजना हुन लागेको प्रदर्शनीको अन्तिम दिन समापन कार्यक्रम गरिने आयोजकले जनाएको छ।