भक्तपुर, १० वैशाख २०८२ —
तौलाछें–९, भक्तपुरस्थित योगदान बचत तथा ऋण सहकारी संस्था लि. ले आज २५औँ वार्षिकोत्सव मनाएको छ। समारोहको मुख्य आकर्षण संस्थाकी अध्यक्ष राधेलक्ष्मी लाखाजुद्वारा वार्षिकोत्सवको केक काट्दै स्थापना दिवसको स्मरण थियो।
समारोहलाई सम्बोधन गर्दै अध्यक्ष लाखाजुले सहकारीले समुदायमा आर्थिक‑सामाजिक र सांस्कृतिक विकासमा अग्रणी भूमिका खेलेको तर्क प्रस्तुत गरिन्। “हामीले स–साना पूँजीलाई समेटेर सदस्यको जीवनस्तर उकास्ने काम गरेका छौँ,” उनको भनाइ थियो, “सहकारी नै साझा सपनाको जगेर्ना हो।”
कार्यक्रमका प्रमुख अतिथि संस्थापक अध्यक्ष तथा सल्लाहकार रामचन्द्र प्रजापतिले २०५७ सालमा बोकेका सपना आज महिला नेतृत्वले सार्थक बनाएको उल्लेख गरे। “आरम्भमा कोरेका लक्ष्य—सदस्यका हातमा सुलभ वित्तीय पहुँच र सामूहिक समृद्धि—अब व्यवहारमा झल्किएको छ,” उनले भने।
समापनमा अध्यक्ष लाखाजुले पारदर्शिता, सहकार्य र सहकारीका अन्तर्राष्ट्रिय सिद्धान्तप्रति निष्ठा जनाउँदै भनिन्, “हामी आगामी वर्षहरूमा डिजिटल सेवा विस्तार, महिला उद्यमशीलता कोष र वृद्ध–विपन्न लक्षित कल्याण कोष स्थापना गर्ने योजनामा छौँ।”
स्थापना कालखण्डदेखि नै “एकका लागि सबै, सबैका लागि योगदान” भन्ने मूल मर्म बोकेको यो सहकारी स्थानीय तहमा समावेशी नेतृत्व र वित्तीय सशक्तीकरणको प्रतिमान बन्दै गएको छ।