ख्वप, कृष्ण प्रजापति ।
ख्वप नगर दुने न्या लाके न्ह्यः ख्वपया त्वाचाय् दँय् दसं पौष मसान्तकुन्हु न्ह्याइगु नवदुर्गाया वापि पाछायेकीगु पर्व शुत्रफ्वाः तःजिक क्वचाल । अन नवदुर्गा द्यः थ्यंके यंकेवं बहनी लिबाक तकं सर्वसाधारणं न्हापां नवदुर्गायात पूजा बिउगु खः । पूजा पफ्येधुंकालिं अन नकिंपाखें पाथिइ वा तयाः वा भां याकाः उमित अभिषेक याःगु खः । थथे याये धुंकाः उपिं थःगु लागाय् ख्वपय् न्या लाकेगु निंतिं तयार जुइ । थ्वयां न्ह्यः थुगुसी पशुपति गौशाला लागाया जयबागीश्वरी, मध्यपुर थिमि, तोखा व सक्वः देसय् न्या लाकेगु जात्रा क्वचायेके धुंकूगु दु ।
थौं माघ २ गते ख्वपया सूर्यमढी न्याः लाकेगु जात्रा यायेत म्हिगः हे द्यः अन हयाः पूजा पफ्येगु ज्या क्वचायेकूगु दु । नवदुर्गा द्यःयात तःचपाः, ब्रम्हायणी दबू, सुजःद्यमर त्वाः, भफ्ताप्वाः क्वँय्लाछि त्वाः व आदिपद्म महाविहारय् बिज्याका पूजा पफ्येगु व पफ्येकेगु ज्या याःगु खः । थौं न्हिच्छिं सूर्यमढी न्या लाके धुंका बहनी द्यः खः दतात्रय यंकी । कन्हय् माघ ३ गते धाःसा अन न्या लाकीगु चलन दु । वयां लिपा बारं खयेकाः क्वाठण्डौ, गःछेँ, इनाचो लगायत ख्वपया नीछगू थासय् पालंपाः न्या लाकीगु चलन दु ।