भक्तपुर, २०८० साउन २२ः
भक्तपुर नगरपालिकाले २०८० सालको गाईजात्रा पर्व (सापारु) मा प्रदर्शन हुने परम्परागत तथा आधुनिक सांस्कृतिक विधाहरुको प्रतियोगिताको तयारीस्वरुप आज भक्तपुरका सांस्कृतिक गुरुहरुको भेला गरेको छ ।
नगरका दाफा, भजन, सांस्कृतिक टोलीलगायतका प्रतिनिधिहरुको उपस्थितिमा सम्पन्न उक्त कार्यक्रममा भक्तपुर नगरपालिकाका प्रमुख सुनिल प्रजापतिले भक्तपुरलाई जीवन्त सहरको रुपमा परिचित गराउन भक्तपुरका मूर्त र अमूर्त सम्पदा, कला र संस्कृति जोगाइराख्नु सबैको साझा दायित्व भएको बताउनुभयो । उहाँले समाज परिवर्तन र सुधारको निम्ति सबैले आफ्नो ठाउँबाट प्रयास गर्नुपर्ने बताउँदै नजिकिँदै गरेको गाइजात्रा पर्वलाई सुरक्षित, सभ्य र सुसंस्कृत ढंगले सम्पन्न गर्न सबैजना क्रियाशील हुनुपर्ने बताउनुभयो । उहाँले भक्तपुरका सांस्कृतिक गुरुहरु विश्वविद्यालयका प्राध्यापकहरु सरह भएको बताउँदै मानिसलाई शिक्षा र अनुभवले धेरै कुरा सिकाउने बताउनुभयो ।
कार्यक्रममा भक्तपुर नपा वडा नं. ९ का वडाध्यक्ष रबिन्द्र ज्याख्वले सापारु पर्वलाई प्रगतिशील ढंगले सञ्चालन गर्ने उद्देश्य नगरपालिकाको रहेको बताउँदै नगरका विद्यालयहरुमा परम्परागत नाच र बाजाहरुको प्रशिक्षणहरु सिकाउने क्रम चालु रहेको बताउनुभयो ।
भनपा वडा नं. ७ का वडाध्यक्ष उकेश कवांले सांस्कृतिक प्रतियोगिता आयोजनाले सभ्य र सुसंस्कृत समाज निर्माणमा समेत मद्दत पुर्याउने बताउँदै सांस्कृतिक गुरु र कलाकारहरुको सीपलाई जीवन्त राख्न समयसान्दर्भिक प्रतियोगिताहरुको आयोजना हुनु स्वागतयोग्य भएको बताउनुभयो ।
कार्यक्रममा विभिन्न विधाका संस्कृतिकर्मीहरुले लोप हुन लागेका परम्परागत नाचहरुको जोगाउनुपर्ने, प्रतियोगिताका सहभागी र विजेताहरुलाई समयसापेक्ष ढंगले पुरस्कार राशी वृद्धि गर्नुपर्ने, गाईजात्रामा उच्छृंखल गतिविधिलाई निरुत्साहित गर्नुपर्ने, गाईजात्रा प्रतियोगिता मूल्यांकनस्थलमा मात्र सीमित नभई गाईजात्रा रुटअनुसार सबै ठाउँमा प्रदर्शन गर्नुपर्ने, भक्तपुरका कला संस्कृति, नाच र बाजागाजा अध्ययनको लागि अनुसन्धान केन्द्र स्थापना गर्नुपर्ने, उत्तेजित ढंगले बाजा बजाउने अवस्थालाई नियन्त्रण गर्नुपर्ने, आधुनिक र परम्परागततर्फ प्रस्तुत हुने गाइँचा म्येहरुलाई लिपिबद्ध गर्नुपर्नेलगायतका धारणाहरु राख्नुभयो । कार्यक्रममा भक्तपुर नपाका प्रमुख प्रशासकीय अधिकृत विजयकुमार शर्माले धन्यवादज्ञापन गर्नुभयो ।
